2023-09 Besoek program en gebedspunte

 

Loof die Here want Hy is goed.

Ek sê dit nie omdat ek dit so beleef nie, inteendeel is ek eerder by Habakuk. “al sou die vyeboom nie bot nie...” Ek het egter nodig om hierdie woorde uit te spreek ter wille van myself.

Op pad het ek iewers my kredietkaart verloor. Dit was regtig ‘n terugslag, want sommige plekke werk die Capitec kaart nie vir betalings of trek van kontant nie. Daarna hoor ek dat die bank sisteem verander het en by die bank kom ek agter dat ek nou glad nie geld kan trek nie. Saam met die moeg wees van ry het ek angstig begin voel en negatief begin dink. Waar gaan ek nou geld kry om die werk te doen. Baie ander negatiewe gedagtes gaan dan deur mens se kop. Ek besef dat dit nou die tyd is om uit geloof te leef, maar ek kry dit nie reg nie. Tog kon ek staan op ‘n paar waarhede: U wil is beter as myne. U meet my nie aan wat ek reg kry en wat ek nie reg kry nie. Ek is wat U genade my maak. U Here is goed en ek kan U vertrou.

Bietjie later bel ek vir pastor João wat toe bereid is om geld aan my te leen vir die res van die trip en hy dink ek vra te min. Getuienis aksie reageer positief om die geld te leen en deur die sinodale rekening te stuur sodat hy terug betaal kan word. Ek slaap toe goed en vanmore het ek die bonus van baie beter voel en kan ek nou voluit voorberei vir die werk. Om vanuit die Here te leef is ‘n wonderlike ding en dit wat onmoontlik is vir my is by Hom moontlik.

Gister het ek Milange toe gery met die verwagting dat die werk dadelik gaan begin, maar dit is uitgestel na vandag. Ek ry vandag deur na Namitimba om more oggend vroeg te kan begin met toerusting daar.

PROGRAM MET GEBEDSPUNTE

8ste ry na Namitimba Ds João gaan saam soontoe.

9de toerusting in Namitimba – Bid vir die gemeente, want hulle leierskap het uitmekaar geval en almal is bang om voor te loop en dinge weer te organiseer. Bid vir die nuwe dominee Isladge wat hulle daarin moet begelei.

10de Erediens in Namitimba en laaste toerusting. Namiddag terug ry na Milange.

11de Ry na Entre Lagos. Van hier af ry ds Adolfo saam met my. Bid vir ons as span se werk. Dalk gaan ‘n ouderling ook saam.

12de Toerusting in Entre Lagos. Dit is ‘n nuwe kerkie, met geen agtergrond. Insette hier is so belangrik. Ons sal daar bly tot die aand wat ons skuif na die ander kerkie in Entre Lagos “Sanjika”

13de Toerusting in Sanjika. Die kerkie se leier is Meneer Gombe en hulle neem verantwoordelikheid van die twee kerkies van die gebied. Bid om te weet wat die volgende stap is vir hulle en hoe ons hulle kan dien daarmee.

14de Ry na Chiconono

15de Toerusting in Chiconono. Hulle is die afgelope tyd besoek deur Ds Johannes Aucamp van die Geref kerk wat hulle gehelp het met dissipelskap toerusting. Ons gaan egter meer kyk na die praktiese kerk wees en bid saam vir fyn aanvoeling.

16de Ry na Mavago en doen toerusting daar. Dit is ‘n wyk wat lank reeds bestaan, maar wat nog met heel basiese kerkwees besig is. Ander denominasies kom gewoonlik ook deelneem.

17de Erediens by Mavago en voortgaan met gesprekke.

18de Ry na Lichinga. Dit is ‘n nuwe jong gemeentetjie wat nog nie die grondslag van kerk verstaan nie. Bid vir reg hoor en vir die regte onderwerpe van gesprek.

19de Steeds Lichinga

20ste Ry na Malema: Dit is ‘n dorpie waar twee opgeleide ouderlinge vir ‘n maand lank geëvangeliseer het en ‘n paar gesinne belangstelling getoon het. Ons moet gaan kyk wat gebeur het sodat die opleiding van ouderlinge in die toekoms aangepas kan word. Bid, want daar is verkeerde verwagtinge van kerk wees, dat hulle die waarde van Christenskap kan beleef in nie materiële dinge.

21ste Malema

22ste ry na Molumbo

23ste Opleiding en voorbereiding vir bevestiging van dominee Adolfo daar. Die vorige dominee wou nie skuif uit die gemeente nie en op die ou end het hy weg geloop met die helfde van die gemeente. Ds Adolfo moet nou met die res weer van onder af ‘n gemeente bou. Bid vir wysheid om hulle te bemoedig. Ds Adolfo glo ek is die regte persoon om die gemeente weer te dien.

24ste Bevestiging van ds Adolfo in die gemeente en namiddag terugkeer na Milange.

25ste rus

26ste ry na Mocuba

27ste begin terug ry na RSA.

 

2023-09-02 pakkie in Bloemfontein

2 Dae voordat ek vertrek uit die Kaap hoor ons van die behoefte aan Audio Bybels vir 'n vroue konferensie. Ons probeer en.... sowaar dit blyk moontlik om dit te organiseer. Die tale word op besluit en ek stuur die inligting deur of so het ek gedink. Die volgende dag herinner Dalene dat hulle dit nie gekry het nie. Ek stuur weer en ons reël dat ek dit by 'n vriend se kantoor sal optel in Bloemfontein. Ek kom die Vrydag oggend daar aan en daar is toe geen pakkie. Ons probeer die senders kontak, maar die telefoon word nie geantwoord. Ons vind uit deur wie dit gestuur het, maar Courier Guy moet meer inligting hê en ons het dit nie. Ek besluit om bietjie te wag. Terwyl ek wag vra ek die Here of ek moet wag. Hoe belangrik is die Bybels in Sy plan. Ek weet nie waar die pakkie is nie, sê nou maar dit is nie gestuur? Ek wil nie 'n dag verloor sonder rede nie, maar sal maklik 'n dag bly as mens weet dit moet. Ek voel baie onseker. Terwyl ek met die Here praat kom daar 'n pasiënt in (my vriend is 'n oog dokter). Toe sy hoor hiervan is sy dadelik bereid om te help. Sy ken iemand by Courier Guy en vind toe sommer by dr Johan uit of sy haar afspraak later vandag kan inpas. Hy stem toe in en daar trek sy. Die vriendelikste bereidwilligste mens. Dit is daardie mense wat verwar kan word met engele. Sy bel en wil my telefoon nommer weet vir in geval dit onder my nommer geregistreer is. 10 min later bel sy en laat weet dat hulle die pakkie gekry het en dat sy dit bring. Intussen kon ek en Johan 'n baie sinvolle gesprek hê en ons harte met mekaar deel. 

Nephipi en Liaze besoek

In Gile kom ek agter dat alhoewel die gemeente baie agteruit gegaan het, daar nog potensiaal lê. As die regte insette gelewer word, kan die gemeente baie groei.

Die ds het nie soveel bagasie as wat ek gedink het nie en vroeg die oggend laai ons alles. 

Die Murrua berg die oggend voor ons vertrek

Daar is goeie gesprekke in die bakkie, want ons vorder stadig. Die aand ry ons deur Milange met die son wat sak. 

Dit was lekker om weer in Nephipi te kom na soveel jare en van dieselfde leiers daar te kry. 

Volgende oggend kuier ek daar en ry terug na Milange. 

Kyk hoe lyk Mulanje berg van agter na sikloon Freddie

Sondag hou ons erediens in Liazi gemeente wat my eerste gemeente was. Ek kry 3 goeie gesprekke in met dominees en ontmoet weer ou bekendes. 

Na die 2 ouderlinge is ds Adolfo, dan Ds Isladge van Chiconono wat nou in Namitimba dien. Dan João Herbarth en dan ds Eataforde. Regs is ds Nico Mario wat ons tuinier was in 1994 toe ons in die karevaantjie gebly het. 

Ek is terug na Milange en na 6 ure se vrugtelose staan in 'n ry by die bank besluit ek om die volgende dag terug te ry. Die laaste besoek aan Malema is gekanselleer weens verskeie redes. 

Ek slaap vanaand oor in Chiconono en gaan 'n paar dae vroeër terug wees in die koue Kaap. 

Nacala, Nampula, Lugela trip

Die besoek aan Nacala word Saterdag oggend omver gewerp toe ons 20 km buite Nampula moes omdraai weens 'n probleem met die bakkie. Ons stuur toe die twee dominees met 'n taxi.

Die middag gaan ondersoek ek weer die bakkie en daar ontdek ek hoe om die probleem op te los en om die bakkie nog lekkerder te laat ry.

Ons ry toe Sondag oggend vroeg en is betyds vir die erediens. 

Ons is verras om ongeveer 40 volwassenes en 15 kinders daar te kry. Daar was 5 kore en baie moeite word gedoen om geld in te samel om 'n perseel in die stad te bekom.

In die toerusting gaan ons redelik intens deur 'n proses waarin 'n gemeente kan ontdek hoe om op die regte fondasie te bou en die Here se wil bo alles te soek en te gehoorsaam. Dit is dikwels anders as ons eie wil en planne. Ons leer ons self om deur God se Gees aan God se wil te onderwerp. Dit gebeur deur 'n proses van praat en worstel en soek tot ons weet wat Hy wil. Ons wil dikwels ons self en die kerk bou en beskerm (ook gestruktureerd en aanvaarbaar en gemaklik) terwyl Hy die kerk wil gebruik in die wêreld. Mense het baie intens geluister. My stem was weg, maar so deur die gekraak is die betekenis tog deur die genade oorgedra. 

Die aandete voor die kerk muise se tente. 

Die Maandag oggend het ons op pad terug gou by die see 'n draai gaan maak. 

Jy kan die see bodem seker 15 meter diep duidelik sien. 

In Nampula het ons 'n vrugtevolle gesprek gehad tussen Annlin gemeente Tumbine Sinode en Nampula gemeente. 

Ek laai Dirk en Giepie af by die lughawe. Ek het min van hulle lekkernye geëet, maar nou mis ek hulle so ek haal in met wat hulle agter gelos het. 

Na die lughawe gebeur 'n wonderwerk deurdat ons al ds Tuvuliua se huisraad in en op die bakkie kry. 

Dit het stadig gegaan en alles het goed nat gereën, maar die aand was hulle in Lugela. Ek moes 4x4 gebruik om in die nat tot by die huis te kom. 

My lyf is nog nie reg nie, maar deur die Here se voorsienigheid is ek nou in Gile om die gesin more na Nephipi gemeente te vat so 50km Noord van Milange. Hierdie is my uitsig hier:

Die pad is een van die paaie wat ek baie geniet alhoewel dit 'n 20km per uur pad is. Ek sal versigtig moet laai more om dit vol gelaai te ry. Gaan die heel dag neem.

Dit is vir my geweldig waardevol om saam met God hier te werk. Hy is lief vir ons en ek leer dit nog aan. Ek probeer 'n diens lewer en wat gebeur? Hy bou 'n onbeskryflike bouwerk in my! Hoe heerlik is dit om ook Sy liefde vir Mosambiekers te sien. As dit hard moeilik en spanningsvol word, dan loof ek Hom hiervoor en dikwels bring dit rustigheid en vreugde. Daar begin dit reën. Lekker aand. 

Cunle besoek

Cunle is in Ribaue distrik, maar meer op die platteland. Die kerkie moet baie baklei teen weerstand in die omgewing. Die leier was self gevange geneem vir 'n kort tydjie. Ten spyte daarvan is daar 'n paar gesinne wat opgedaag het. Verder het die kerkie nog nie verstaan op watter maniere die Here jou seën nie. Dit is verskraal tot 'n materiële seën van kerkgebou met sinkplate en sulke goed. 

Die ander aspek wat my baie geraak het was hoe die tradisionele denke mense gevange hou. Daar is baie druk van families en ook druk as gevolg van hoe die mense die geeste wêreld beleef. Vrees speel 'n groot rol. By Nacuculu kom mense en vra vir gebed vir nagmerries en slegte geeste wat hulle pla. Siektes wat deur die geeste veroorsaak word, selfs seksuele probleme. Die lys raak baie lank soos mense eerlik hulle probleme bring dat ons daarvoor bid. Hulle beleef ook dat wit mense se gebede baie sterker is en daarom die amper desperate poging om gehelp te word. 

cunle posisie (kliek op skakel vir kaart) 

Met hierdie agtergrond hanteer ons verlossing en God se liefde as seën. Hoe dit vir ons in 'n verhouding met God bring en hoe bekering werk. Dit het tyd gevat maar die terugvoer is dat hulle nou eerder God sal soek as die dinge van God. Hoe God se teenwoordigheid en liefde ons as mense ontwikkel en laat groei en dit laat uitsprei na ander.

Daar is baie prakties gepraat oor die geeste wêreld en vertroue op 'n goeie God. 

Verder ook hoe mens druk en aanvalle saam met God hanteer. Hoe mens lofprysing gebruik om op God te fokus en nie op die gevare. Hoe mens jouself oorgee aan God se wil wat beter is as ons wil. 

Vanuit ons beperkte verstaan glo ons dat daar vir die groepie werklike deurbrake was wat hopelik in die praktyk 'n verskil gaan maak. Ons dank Hom en bly ernstig bid vir die 5 kerkies in Ribaue distrik.

Gisteraand het ons terug gekeer na Nampula en is ons reeds gelaai om na Nacala stad te vertrek.