Mocuba dorp en die Here

Met die Amerikaanse groep wat nou 2-2 by 4 families tuisgaan, kry ek geleentheid om intensief met leiers van die gemeenskap om te gaan. In my is daar 'n dringendheid dat die evangelie prakties transformasie sal bewerk in die gemeenskap waar daar soveel korrupsie leuens ens die gemeenskap se vooruitgang heeltemal kniehalter. Daar moet net iets gebeur!
Vanuit die kuier by leiers is daar veral by 3 geleenthede lang gesprekke hieroor gevoer. Ek was by al drie die geleenthede verras met die verstaan van my hart en hulle was ook verras oor my insig van die gemeenskap hier. Dit het 'n openheid gebring in ons gesprekke en ek hoor stories oor mense se lewens wat normaalweg nie sommer gedeel word nie. 'n Ouderling deel sy lewe en ek hoor ongelooflike stories. By 'n gesiene pastoor hoor ek stories oor die oorlog waar hy ook vir jare aan deelgeneem het. Daar was veldslae wat nie bekend gemaak is nie, want dit het nie goed afgeloop vir die regerende party nie. Verder ook hoe die Here hom gekeer het om ooit 'n skoot te skiet in die oorlog.
Saam met die stories, deel ons ook diep oor die nood in Mocuba. Van die uitdagings is:
Baie kinders in die skool kan nie sy klas deurkom as die onderwyser nie 'n bedraggie van die familie kry nie.
In die besigheids wereld is mense ingestel op sy eie wins en gee nie om vir ander. Mense mislei mekaar op 'n baie groot skaal en jy kan niemand vertrou met dinge soos gewig of hoeveelheid stene ens nie.
Kerke baklei baie meer teen mekaar as teen die boosheid in die gemeenskap.
Ons gesels ook baie oor die leierskap styl wat baie hirargies van aard is en wat gewone gelowiges in die kerk heeltemal ontmagtig ipv bemagtig.
So kan ek aangaan en op die ou end deel ons die begeerte dat alle gelowiges, leiers en lidmate net weer sal leer wat 'n persoonlike verhouding met Jesus is sodat Hy ons sal lei en Sy karakter ons sal vul omdat ons uit hom leef. Ons kan uit Hom leef soos die lote uit die wingerdstok leef.
Ons deel ook die baie vrese om op te staan vir die waarheid. Die gemeenskap druk mens in 'n lewe saam met die leuens ipv om die lig en waarheid te bring.
Hierdie gesprekke bring ook vriendskappe wat ek nie verwag het nie. Die jong man met wie ek gesels is van die Gereformeerde kerk hier in Mocuba en van ons gesprek is dit 'n riem onder die hart om elke keer as ek hier instap nou baie vriendelik gegroet te word en eers 'n gesprek te hê voordat ek die huis kan in.
Die gesprekke het nog nie materiele uitkomste nie, maar daar word gevra: Wat nou volgende? Dalk kan ons weer 'n gesamentlike gesprek hê voordat ek weer die 20ste terugkeer na RSA?
Die dringendheid wat ek glo die Here in my hart gesit het, maak mens ongeduldig en wil die ding verder druk, maar saam met die gebruik van elke geleentheid is dit nog steeds die Heilige Gees wat die proses lei waar wanneer en hoe Hy wil.
Dit verhoed my nie om te bly bid, "Here laat iets vinnig gebeur" en ook vir my ondersteuners te vra om saam te bid nie.

Waarvoor bid ek in RSA?

Sonder om nou in te gaan op die dinge wat moet verander in ons kerkverbande en samelewing, dink ek ons stem saam dat dinge nie dieselfde kan bly nie. Dit is ook nie so maklik om te bepaal wat die tendense is nie, maar dit mag dalk wees dat ons in 'n tyd lewe waar Bybels gefundeerde waardes dalk aan die afbreek is.
Bid is een van die reaksies op 'n baie dringende tyd waarin ons lewe. Dalk is alle tye nog altyd dringend, maar dit maak nie dat ons moet terugsit en aanvaar nie. Ons moet tog as geroeptes lewe met 'n lewensdoel om lig en sout te wees. Om te bid raak dikwels meer van 'n taak as 'n verhouding, en word dikwels meer gedoen uit ons eie begeertes as uit die liefde van God. As ons dan oor gebed praat, dan is dit belangrik om in verhouding met God te kom waar ons meer luister as praat.
Verder is dit egter ook belangrik om deur Sy Gees gedryf te word na dit wat vir God belangrik en dringend is. Ons begin in die verhouding Sy liefde vir die wêreld verstaan en kry seer vir dit wat verkeerd gaan en raak kwaad vir dit wat sleg en boos is, sonder om die mens wat  mislei is te haat.
In 'n gebedsessie saam met 'n baie toegewyde persoon wat gereeld vir alle leiers bid, begin my gedagtes hardloop.
Ek onthou 'n gebeurtenis in die sosiale media waar 'n buitelandse vrou op 'n SAL vlug gesukkel het om haar baba te troos terwyl die kos uitgedeel was. In haar frustrasie, het die SAL lugwaardin gevra of sy die baba kan vashou sodat die ma kan eet. Die ma was te dankbaar en die lugwaardin neem toe die kind, maak dit in 'n kombers op haar rug vas terwyl sy verder bedien. Die ma skryf toe op sosiale media van hoe dankbaar sy is. In die opmerkings van die storie, kom daar diep negatiewe opmerkinge soos: Sy verval weer in 'n slawerny mentaliteit, die swarte moet maar altyd die witte bedien ens. Tussen die negatiewe opmerkinge begin ander vrae vra soos, sou jy haar nie gehelp het nie. Wat is die menslike ding om te doen ens. Die mooi van die storie is dat die daad van liefde, selfs al probeer sommiges dit negatief maak, steeds 'n indruk gemaak het. Die bose kan dit nie dood maak nie.
Wat het dit nou met gebed te doen, wel vir my was dit duidelik dat die Here my help met die storie om die bose te haat, maar die mense wat die boosheid doen lief te hê. Die ding wat bo-menslike insette verg om te kan doen. So dit is dan waarvoor ek bid.
1. Ek praat met die Here oor die goed wat boos en negatief is in ons land en met Hom kan ek brutaal eerlik wees. Mag wonder oor wanneer dit wat ek voel gemotiveerd word deur my vrese en onsekerhede vir die lewe en wanneer dit werklik boos en verkeerd is.
2. Ek bid vir hulle wat in leiers posisies staan en hulle wat duidelik onbybelse optrede toon. Dat hulle genade so diep kan beleef dat dit hulle lewens verander.
3. Ek bid vir christene in die land wat met die negatiewe dinge te doen kry, dat hulle nie moed verloor nie, maar die ewige hoop oor en oor kan beleef, ten spyte van omstandighede.
4. Ek bid vir christene wat met klein dade van liefde die land kan verander, want hulle dade van liefde word deur God gebruik om ons land, Afrika en die wêreld te verlig en te verander.
5. Ek bid vir elkeen wat die Here ken om Sy hart te ken en die dringendheid van liefde te beleef. Dat elkeen sal weet wanneer ons  met valse verstaan en belenisse van liefde te doen het en wanneer dit werklik God se liefde is. Ons kan nie net opervlakkige sentimentele gevoelens met ware liefde verwar nie.
6. Ek bid vir christene sodat hulle kan besef dat hulle baie meer kan doen as waartoe hulle menslike kragte in staat is. Elke kind van God kan die liefde van God deur hulle toelaat om inisiatief te hê, en lief te hê op praktiese maniere. Maniere wat stories van lig veroorsaak en waarteen die duiwel en sy magte verslaan word. Stories wat ons land gaan verander.
7. Ek bid ook dat Christene nie bang sal wees om dit wat verkeerd is uit te wys nie. Dat ons nie die dinge wat boos is net sal vermy nie, maar dat ons dit aan die lig sal bring. Dat daar wysheid sal wees om te weet wanneer ons konflik nodig het. Dat elke Christen so 'n nou intieme verhouding met Jesus sal hê dat hy of sy deur God gelei sal wees in liefde en waarheid.

Kenmerke van kerk as beweging in die wereld

Vir die opbou van 'n gemeente moet daar 5 aspekte van kerk wees wees, soos wat Eff 4 dit omskryf. Die Here gee die gawes daarvoor in die vorm van mense wat daardie gawes het:

Apostolies

Profeties

Evangelies

Herders

Leraars

Apostolies

Die kerk se bestaansreg is om gestuurd te wees in die wêreld. Alles wat die kerk doen is hier rondom gesentreerd. (Hart van God is dat Hy lief is vir die wêreld en dit nie net met woorde nie). Kerk is resultaat van gestuurd wees. Jy is eers gestuur en dan vorm kerk om dit te vervul. Kan nie by kerk begin en later gestuurd word nie, want dan is dit nie kerk nie. Missiologie dan ekklesiologie

Die rede vir ons bestaan is om die kerk op nuwe plekke te vestig! (doen ons dit? Bottelary gemeente ens)

Bou gedurig nuwe kapasiteite om die roeping te prioretiseer. Omdat dit nie altyd die prioriteit is nie.

Is ‘n beweging: Dus dinamies, aanpasbaar, geïntegreerde, innoverende, reproduserende beweging.

Die apostoliese funksie is om gedurig die besoedeling van die roeping te voorkom en ons werklike DNA te behou as gestuurdes. (Gestuurdheid word baie maklik afgebreek in ander doelwitte wat nie op die DNA van Christus, of kern oortuigings, gebou is nie). - As die oortuigings nie behou word nie, verswak die effektiviteit van die beweging -

Die Apostoliese gestuurdheid maak al die ander funksies sinvol. Alle funksies is hierop gebou en dit gee betekenis daaraan.

Ons plant nie kerke nie, maar plant die evangelie, die Jesus storie in geheel.  Dit lei tot vorming van kerkwees. (Geloofsgemeenskappe gebou op die evangelie). As enige gemeente nie ander gemeentes begin en versorg nie, dan is dit oneffektief (deficient).

Nuwe gemeentes lyk altyd anders as die vorige. (Nie vaste patrone gebou op stuktuur nie).

Entrepreneurskap word gekultiveer. Dit gaan oor die gee van toestemming en ‘n oop veld en atmosfeer vir innovering. Aanmoedig om te probeer en risikos te loop en deur foute te leer.

Krities belangrik om ‘n buite grense netwerk en kommunikasie te ontwikkel.

Behou die eenheid in die verskeidenheid.

Reageer vinnig op elemente wat gesamentlike lewe bedreig. (Moenie verskille vermy, hanteer dit).

Kry die groter prentjie.

Gedurige mobilisering van alle agente betrokke.

Apostels is hulle wat geneig is om meer risiko’s te neem en antroponeuries te werk.

Profeties

Beskerm die verbonds verhouding tussen God en mense. Vertikaal

Behou ‘n oriëntasie vanuit God self deur luister, gebed, en reaktiewe gehoorsaamheid.

Reageer met patos: God beleef dinge baie diep. Gevestigde liefde vir wêreld. Passie. Sy diep haat vir die sonde en onregverdigheid. Voel wat God voel. Hartseer, pyn, vreugde, woede, passie, genade ens.

Eerstens is dit om ‘n oor vir God te hê. Openheid vir Hom, gefokus op Hom en gehoorsaamheid.

Is ook ‘n oog, die geestelike insig. Nie om net vir God te sien nie, maar om soos hy te sien. Om dus ‘n openheid teenoor ‘n heilige visie en kreativiteit.

Is ook ‘n mond, om te praat in die naam van God. Bereid om verwerping te beleef en te ly. Want profetiese woorde is ook korreksies.

Is ook ‘n hart om te voel wat God voel. Die hart is die fokus van die profeet se boodskap. As dit in die hart verkeerd gaan, gaan die res ook verkeerd. Om Heilig en regverdig te wees.

Bou verhouding met ander. Horisontaal

Dit is ‘n verantwoordelikheid vanuit die opregte ontmoeting en verhouding met God.

Nie net verpligting, maar ook herinnering van God se liefde en genade wat red.

Oproep tot bekering Gedurig te leer, om af te leer en herorienteer. Onverbiddelike oproep tot bekering. Baie belangrik vir om die heilige verhouding met God te onderhou en die rebelse sondige hart van die mens te ken uit te wys en te help hanteer.

Stel in die ope die pogings tot menslike strewe na mag en misbruik van posisies. Dit ook in politieke, ekonomiese, en religieuse instansies. Veral hard op valse religie en skynheiligheid.

Die profeet is sensitief vir die innerlike geestelike stryd.

Onderskei ook tussen vals en ware aanbidding. Die wêreld is vol van vervangings vir God wat afgodery is. Daar is ‘n verband tussen die verloor van ons profetiese stem en die oorneem van giftige rituele religie. Die profeet help die verhouding tot God om persoonlik en direk te bly.

Strewe na regverdigheid is deel van profeet se aanslag. Hou fokus op armes, verontregtes en gemarginaliseerdes. Prioretiseer etiese aksie, goeie dade en liefde vir regverdigheid en nederigheid.

Oproep om Heilig te wees.

Kommunikeer ‘n dringendheid.  Enige organisasie weet dat dringendheid ‘n belangrike aspek van groei en oorlewing is.

Die profeet verstaan iets van, en gee ‘n duidelike prentjie van wat die lewe kan wees, deur. Voorskadu van God se wil op aarde soos in die Hemel.

Die profeet bevorder leer deur gedurige ongemaklike vrae. Skep kondisies vir heilige ontevredenheid.  

Hulle openbaar wat in die hart is.

Hulle krap heeltyd vir verandering

In die wyer gemeenskap is hulle voorstaanders van kulturele verandering. Werk met die verskil tussen God en ons gehoorsaamheid.

Hulle word dikwels verwerp deur mense wat hou van hulle eie maniere. Daarom is hulle die eensames en kan maklik misverstaan word.

Evangelies

Om die boodskap daar buite te kry, maar ook om ‘n positiewe antwoord terug te kry.

Dit is die bemarkers van die gemeente.

Met woord en daad aangepas vir omgewing, mense uitdaag tot radikale reorientasie van hulle lewens.

Die hele kerk moet in staat wees om die boodskap van die ontvouende kerk uit te dra.

Doel is om ‘n reaksie te kry op boodskap.

Uitnodigende atmosfeer te skep in gemeente.

Boodskap moet die werklike vrae van die gemeenskap aanspreek en nuwe lewe bring wat motiverend is vir die hoorders om ook evangeliste te word.

Aangepas in kultuur

Waardevolle boodskap

Dit skep ‘n handelsmerk vir die gemeente en bly getrou daaraan.

Waardeer elke persoon individueel.

Dit is ook ‘n demonstrasie van die goeie nuus.

Trek mense na die reddende storie van Jesus en bring hulle in die verskillende bedieninge van die gemeente.

(Vir Proteahoogte, hulle is die mense wat ander betrokke maak).

Boodskap is dus motiverend, lewe gewend, sinvol vir persoon wat hoor, lewens veranderend. ‘n Proses van die Heilige Gees.

Alle lede is betrokke hierby!

Dit is mense wat oortuig, en infekteer met ‘n Jesus virus. Kan nie anders as om ook aangetas te word nie.

Agente van bekering of verandering.

Bemiddel tussen God en mense. Sterk priesterskap.

Goeie nuus mense

Herderskap

Agente van God se genesing.

Bevorder ervaring van gemeenskap (behoort)

Vriendskap gemeenskaplikheid, versoening, sosiale bande, liefdevolle verhoudings. Om Jesus se liefde te wys.

Skep ‘n geloofwaardige getuienis.

Beskerm die liggaam. Daar is altyd selfsugtige lede, en herderlike proses is om te beskerm teen invloede van binne. Moet dus mense met negatiewe gedrag identifiseer, korrigeer en dissiplineer.

Promoveer genesing. Sorg vir die siekes, gebed en berading.

Promoveer insluiting en omarming van alle klasse en etnisiteite en geslagte. Respek vir armes en uitgesluitenes.

Dit is ‘n dissipelskap proses. Vorming van ‘n gemeenskap na die beeld van Christus.

Skep plek met atmosfeer waar mense floreer en groei. Geleentheid om potensiaal te bereik.

Ondersteun mense om konsekwent te lewe as christene.

Kultiveer ‘n familie van God. God as Vader met broers en sisters.

Liefde vir mekaar word die boodskap wat die daar buite kan sien.

Herderskap is sensitief vir wat in gemeenskap gebeur, is simpatiek. Ken mense en hulle stories. Elkeen is belangrik, en tree in vir die wat uitval of alleen is.

Leraars of lering

Skep ‘n bybels gefundeerde wêreldbeeld in ‘n vyandige konteks. Om die wêreld deur geloof te kan sien.

Om wysheid en verstaan te vestig. Skep nuuskierigheid in die soeke na insig.

Verstaan die Bybel. Gemeente moet sy eie en gemeenskap se skool wees. Ontwikkel lewensfilosofie.

Skep liefde vir woord.

Bring gesprek met God van lede.

Ontwikkel kursusse en materiaal om deur verskillende medias beskikbaar te maak.

Intergreer lewe en denke. Dit moet geleef word om verstaan te word.

Bring lewenslange leer by almal.

Moet idees kan oordra aan almal in verskillende kulture en generasies.

Skep kultuur van leer, as manier van leef vir jou hele lewe. (Skep inoefening van vemoeë tot erkenning van valse oortuigings en prysgee daarvan). Lewenslange transformasie proses.

Onderwyser wees help mense om hulle lewe te sien soos God dit sien en die lewe te ervaar vanuit Hom.

Vorm die denke en identiteit van God se mense.

Lering is nie spekulasie, maar bediening van idees.

Jy kan net leer wat jy weet, en onderwysers is dus mense wat besig is met idees.

------------------

Al die funksies is teenwoordig in die gemeente, want God gee dit as gawes vir die gemeente. Dit hoef nie geskep word nie. Dit moet net fokus op die omgewing om die ontwikkeling van elkeen aan te moedig. Al die DNA van die boom se saad is reeds daar. Die saad word die boom in al sy glorie.

Wanneer daar leierskap is wat dominant is en die leier sterk is in een aspek, dan word daardie funksie se geur vergroot en ander meestal afgeskeep en selfs onderdruk.

Voorbeeld van een dominante aspek. Herder dominante leiers gee 'n liefdevolle gemeenskap gerig op mekaar se probleme eenheid in  geestelike lewe. Verder sal neig om risiko's te vermy sal inter afhanklik wees, oor sentimenteel. Uitsluitend, oor beskermend en versigtig.

Ander voorbeeld: As die dominante funksie apostelskap is, dan neem die gemeente risiko’s, nuwe grense word gedurig oop gebreek ens, maar die gemeente word rigied en taak gerig.

Indien dit nie goed gaan in ‘n gemeente en die leierskap in een funksie goed is, dan is die gevaar daar dat die leierskap ook geneig is om daardie funksie waarin hulle goed is net verder te bevorder as antwoord op die uitdaging. Op die manier is hulle besig om die wanbalans te vererger.

Die ander probleem is dat dominante funksie gemeentes mense met dieselfde dominansie aantrek. Dit het bv baie gebeur by charismatiese bewegings.

Mocuba vir Jesus

Een van die dominees in Mocuba van 'n ander christelike denominasie, besoek my omdat hulle belang stel om die Prado te koop. Ek is vol maag krampe, maar stuur die gesprek eers na die onderwerp van die dorp se geestelike lewe. Baie gou deel ons met mekaar die groot uitdagings van die dorp en is saam bekommerd oor oneffektiewe denominasies wat nie saam werk nie. Die uiteindelike van die gesprek is dat hy 'n paar ander dominees nooi wat hy weet ook hierdie bekommernis deel, en ons het mekaar ontmoet gister aand.

Ons hoor van die baie Mslm buitelanders wat net Mlms in diens neem. Mense word dus msl om werk te kry. Verder oor Christenskap wat verval en en denominasies wat elkeen sy eie ding doen en ander kritiseer. Binne dit probeer ek toe die fokus plaas op 'n visie wat mense kan saam trek. Op 'n stadium vra ek dat elkeen, wanneer hulle huis toe gaan, met die Here moet praat en huil oor dit wat die Here oor huil en dan begin droom oor hoe dit sal wees as dit opgelos is.

Daar word op die ou end besluit dat daar 'n groep gevorm sal word wat 'n koninkryk fokus sal hê. Ek is beskikbaar om met elke besoek deel te neem aan die proses hoe dit ookal ontwikkel.

Ek probeer om te wys op die belang daarvan om elke Christen te bemagtiging om te doen dit waarvoor hy of sy geroep is. Om te luister na hulle en wat die Gees vir hulle sê. Vertrou die manier waarop die Here elkeen lei en bou die gesamentlike getuienis daarop. Dit is 'n kragtige manier om die dorp vir Christus te wen. Op die manier verander ons 'n van bo af proses wat so diep in Mosambiek gewortel is.

Ek dink nie die idee het al grond gevat nie, maar ek glo die saadjies word gesaai en die Here sal dit laat groei indien dit moet groei. Daar is wel intens geluister en saam gestem. Ons gesels ook oor 'n tipe leierskap wat bemagtiging is en moet wees.

Op die ou end gesels ons vir 3 ure aaneen en kom dit nie eers agter nie.

Bid gerus saam oor Mocuba, want soos die Mosambiekse president gesê het, Mocuba is die plek waar alle paaie ontmoet. Ons het dan nou ook 'n kerkgebou hier as gereformeerde tradisie en hier is 'n Geref Bybelskool. Die baie potensiaal moet net op die grond kom. Ten minste dit is my begeerte wat ek het omdat ek glo die Here het dit begin.

Lidmate raak betrokke in Mocuba

Een van die belangrikste doelwitte vir die bouwerk in Mocuba is om die gemeente te help om betrokke te raak by die kerkgebou en die werk daaraan. Dit gaan op die ou end nie oor die gebou nie maar oor die mense.

Ek en my ondersteuners bid baie daarvoor dat die lidmate betrokke sal wees in die Koninkryk en dat die gebou hulle daarmee sal bystaan. Die gemeente is baie jonk en so ook die denominasie van die Gereformeerde kerk.

Die vier wat aan die gebou werk kom van Milange af en is gaste van die gemeente. Tog werk hulle meestal alleen sonder ondersteuning van die plaaslike lidmate. Hulle slaap ook in die kerkgebou op hulle eie. Ek slaap by “Osivela wa Jesu” by Bernadette.

Vrydag nag kry een van die werkers ‘n nagmerrie en angs aanval. Hy skree in paniek omdat dit voel of iemand hom om die keel beetgekry het en wurg. In die verwarring in die donker om die misdadiger in die hande te kry val hulle oor goed en val mekaar aan. Gelukkig was die besering min. Die bure uit die omgewing kom kyk wat aangaan. Later in die nag kom mense en loer deur die diefwering by die vensters en sê hulle weet hier is geld en iemand gaan nog dood gemaak word.

Die hele situasie is vir die plaaslike gemeente ‘n groot verleentheid, want gaste word beskerm en versorg en daar was nie eers een van hulle daar nie. Die hele bou projek word dus nou ook ‘n geestelike stryd. Is daar redes genoeg om nie die werk te los en terug te gaan huis toe nie. Die vrese loop hoog, want die soort van gebeurtenisse word as aanvalle gesien deur bose magte georkestreer deur mense wat slegte bedoelings het. Mense wil hulle dus nie daar hê nie.  

Ons bid saam en die werkers vind genoeg vrede om voort te gaan met die werk. Die leiers en dominee voel skaam oor die hele ding en skielik begin almal dink oor wat hier aangaan. Wie se gebou is hierdie en wie is verantwoordelik. As die werkers nou loop, wie gaan skade ly ens. Vinnig word erken dat die gebou aan die gemeente behoort en dat hulle, gefaal het om hulle gaste te versorg.

In die erediens word daar deur die hele gemeente gebid vir die werkers.

Saterdag aand word ek gevra om Sondag te preek. Sondag oggend kon ek bietjie voorberei. In die gemeente self, verander my preek egter. Ons kry reg om ‘n gesprek aan die gang te sit oor getuie wees van Jesus. Ter opsomming besef ons dat ongeletterde mense deur die Gees van God wonderwerke kan doen en as dit gebeur dan het hulle niks om op trots te wees nie, want dit is God aan die werk. Die bouwerk en wat gebeur het bring die gemeente nou voor uitdagings. ‘n Noue verhouding met God deur Sy Gees wat in ons woon sal ons begelei en wysheid gee in alle omstandighede. Verder bid ons saam en moedig mekaar aan waar ons bang en onseker is. Dit help nie ons gaan net vir die Here vra om die omstandighede te verander en dan eenkant gaan staan en niks doen nie. Die Here werk deur ons om omstandighede te verander. Dit leer ons uit die verhale in die Bybel. Nou wat gaan ons doen. Opsommend kom die antwoord dan ondersteuning en voorbidding gedoen gaan word, besoeke en saam werk sement meng ens. Aanmoediging en skenking van kos piesangs en help kos maak.

Teen die einde van die diens was daar ‘n groot hoop stene in die kerkgebou wat geskuif moet word na buite. Die hele gemeente het onmiddellik ingespring en drie rye gevorm en so die stene in die ry afgestuur tot buite en daar gepak. Binne ‘n uur was al die stene buite met baie lag gesels en grappies maak saam met die sweet (Was lekker warm en bedompig).

Ek is nogal nuuskierig om te sien hoe ver die toewyding gaan strek en hoeveel gaan kom help. Bid daarvoor en ek sal laat weet hoe dit more gaan. Die Here werk op wonderlike maniere.

Opwinding van God se transformasie

Ek vertrek uit die Kaap met 'n kopseer en fisies sommer swak. Seker iets verkeerds geëet. 

Soos ek vorder noord, praat ek met die Here al is dit 'n ongemaklike praat. As jy so moeg is kos dit soms inspanning om op Hom te konsentreer. Tussendeur lees ek Allen Hirch se boek 5Q, wat my oor die laaste maand help met 'n duideliker visie van dit waarna ek, met diep oortuiging, streef. 

Op Blantyre is die lug sommer dik van die humiditeit en dit laat my goed voel, want ek beleef die wêreld waarvoor ek lief is.

Dit is ook groen en langs die pad lyk baie beter as wat die twee fotos kan weergee:

By die grens is ek bekommerd oor hoe ek die migrasie gaan oortuig dat ek nie 'n brief nodig het om die land in te kom nie. Gewoonlik word jou bagasie op drie plekke deursoek. Kan julle glo, niemand deursoek my goed nie en almal erken my en is vriendelik. 

Hoe lekker was dit om nie kerkleiers die hand te gee nie, maar vriende. Ek stel myself in om die goeie van elke oomblik te beleef en die kopseer verdwyn en ek voel sommer baie beter. Dit reën nou vir meer as 'n uur lekker. Dink net hoe dit 'n Kapenaar se hart kan laat voel.

Ek is agter op motorfietsies gebring tot by die sendingstasie, wat verlate hier lê. Dit lyk goed, maar dit is baie stil en vreemd dat hier niemand is nie. Muskiete is baie en ek smeer dik. Ek dink ek gaan lekker slaap.

Die opwinding in my hart is nie van my af nie, dit is nie van iets af nie, dit glo ek kom van iemand. Daar is die opwinding om in my verbeelding te sien hoe mense geïnspireer word deur die Gees van die Here om voluit te lewe, lief te hê en almal te verras met hulle goedheid. Daar waar almal die kerk is en mekaar help om 'n intieme verhouding met Jesus te hê. Niemand wag vir leiers nie, want leiers kom agterna en versterk die inisiatiewe van elke christen, rus toe ondersteun en help reg van agter af uit 'n dienende karakter. Elke gelowige word 'n koning met sy roeping en as die Here deur iemand iets doen, is daar niks om op trots te wees nie, want dit is die Gees in hom of haar wat dit doen. Op die manier word die onmoontlike moontlik!! 

So sien ek hoe die wêreld vir Christus leer ken in 'n magtige beweging van God.

Om dit te bereik moet daar ook baie idees en verstaan van kerk wees afgebreek word, daar moet openheid kom om die oneindig intieme diepe liefde van God vir elkeen te kan begryp, soos Paulus ook bid. Verstaan van wat 'n verhouding is. (Ek is besig om baie hiervan te leer). Hoe om onbeweeglike diep oortuigings van God te hê, so diep dat dit jou lewe bepaal en jou eie fisiese lewe niks is daarteen nie. Dan is daar niks meer oor om jou geloof dood te maak nie, want jy weet. Jou Vader is!! en Hy is goed. Ons word mee gesleur deur die stroom van Sy liefde na die gebroke wêreld en so ver ons saam gesleur word, word sout water vars en begin dit lewe bring. Pyn vernedering, foute en swakhede, is nie meer 'n vyand, want die wete van die oorwinnaar is groter. Ons deel maar net in Sy lyding soos ons ook in Sy opstanding deel.

Grootste opdrag, wees lief vir jou naaste

In 1980 was 24% van die wêreld onbereik met die evangelie. Dit was meer as ‘n Biljoen mense. Vandag is 29% van die wêreld onbereik wat 2.1 biljoen mense is. Die tendens is dus dat daar al meer mense sonder die goeie nuus van Jesus moet groot word lewe en dood gaan sonder ‘n geleentheid om God se woord te hoor.

Behalwe vir die vraagstuk of sulke mense Hemel toe gaan is daar nog die wete dat daar nie ‘n lewe is sonder Jesus nie. Alles wat die wêreld laat ontwikkel en beter word, kom wanneer mense lewe binne die atmosfeer en vasgestelde grondwette soos deur God bepaal word lewe. Dit bring voorspoed en lewe en alles wat gebeur sonder Jesus bring die dood. Die resultate van mense wat lewe sonder God is dan ook die dood en verwoesting.

Vir ‘n beter wêreld moet ons ons Vader se grondwet  verstaan en vreugde vind daarin. Dit bring vervulling en verminder regerings wat lyding en onreg veroorsaak ens.

In kort: DIE WÊRELD MOET WEET! God self gee so om vir die wêreld dat Hy alles doen en die deur oopgemaak het deur Jesus dat almal gered kan word. Nou is Hy self besig om die wêreld te bereik. Hy roep Sy kinders op om die nuwe lewe doelbewus uit te leef sodat die wêreld sal weet.

Kom ons beleef God se hart vir die wêreld en laat ons geen steen onaangeroer laat om hierdie lewensroeping uit te leef.

Wat het ons bereik aan die einde van ons lewens as ons nie op ‘n manier hierdie roeping uitgeleef het nie?

Dit is holisties, so daar is soveel kreatiewe opwindende maniere om dit te doen in ons daaglikse lewens orals waar ons beweeg. Dit vra egter radikale aanpassings. Kom ons moedig mekaar aan!

God is in Sy wese gerig op die wêreld. Om ook so te wees in navolging van Hom, is menslik baie moeilik en selfs onmoontlik. Navorsing het bewys dat ‘n geloof gemeenskap wat nie met sending in die hart begin het en alles daar rondom georganiseer het nie, is dit feitlik onmoontlik om te verander en weer vanuit die roeping te begin leef. Dit gebeur net nie.

Om die rede is ‘n verhouding met die Here deur Sy Gees so krities. “Maar julle sal krag ontvang wanneer die Heilige Gees oor julle kom, en julle sal my getuies wees in...” Dit wat vir my onmoontlik is, is by God moontlik. Ek kan nie eers baie basiese veranderinge in my eie lewe in baklei nie, ek het Hom nodig in my. Dan begin dinge wat menslik onmoontlik is gebeur.

Ek glo nog dat ons geloofsgemeenskappe getransformeer kan word. Ons het mekaar nodig en moet met mekaar praat en saam werk. Kom ons vat hande.